വീടുകളിൽ കണികണ്ട് പിന്നാലെ ക്ഷേത്രങ്ങളിലെത്തി പ്രാർഥനയും വഴിപാടും നടത്തുന്നതോടെ സമ്പൽ സമൃദ്ധിയുടെ പ്രതീക്ഷ കൂടിയായ വിഷുവിൻ്റെ ആഘോഷം ആരംഭിക്കുകയാണ്. മേടമാസത്തിലെ വിഷുപ്പുലരിയിൽ കാണുന്ന കണിയുടെ പുണ്യവും സൗഭാഗ്യവും വർഷം മുഴുവൻ ഒപ്പമുണ്ടാകുമെന്നാണ് വിശ്വാസം. സമ്പന്നമായ കാർഷിക പാരമ്പര്യത്തിന്റെ ആഘോഷവും അടയാളപ്പെടുത്തലും കൂടിയാണ് വിഷു.
നിലവിളക്കിന് സമീപം ഓട്ടുരുളിയിൽ കുത്തരിനിറച്ച് മുകളിൽ കണിക്കൊന്ന പൂക്കളും കാർഷിക സമൃദ്ധിയുടെ ഭാഗമായി നാളികേരവും വെള്ളരിക്കയും വിവിധ തരത്തിലുള്ള ഫലവർഗങ്ങളും അതിനൊപ്പം നാണയങ്ങളും കോടിമുണ്ടും കണ്ണാടിയും ഒരുക്കിയാണ് വിഷു കണിയൊരുക്കുന്നത്.
